Өзбекстандын президенти Шавкат Мирзиёевдин чакыруусу менен Азербайжан Республикасынын президенти Илхам Алиев 23–24-августта Өзбекстанга мамлекеттик сапар менен барат.
Ташкенттеги сапардын программасына ылайык, Өзбекстан менен Азербайжандын лидерлеринин төрагалыгы астында жогорку деңгээлдеги сүйлөшүүлөр жана Жогорку мамлекеттер аралык кеңештин үчүнчү жыйыны өткөрүлөт.
Саммиттин күн тартибине өзбек-азербайжан стратегиялык өнөктөштүк жана союздаштык мамилелерин мындан ары тереңдетүү жана кеңейтүү маселелери киргизилген.
Негизги көңүл өз ара соода жүгүртүүнүн көлөмүн көбөйтүүгө, бизнес жана аймактар деңгээлиндеги кызматташтыкты тереңдетүүгө, транспорттук-транзиттик тармактагы мүмкүнчүлүктөрдү натыйжалуу пайдаланууга, ошондой эле активдүү маданий-гуманитардык алмашууну улантууга бурулат.
Эки өлкөнүн мамлекет башчылары ошондой эле эл аралык жана аймактык саясаттын актуалдуу маселелери боюнча пикир алмашып, көп тараптуу түзүмдөрдүн алкагындагы кызматташтык маселелерин талкуулашат.
Сүйлөшүүлөрдүн жыйынтыгында маанилүү документтердин ири топтомун кабыл алуу, ошондой эле бир катар экономикалык жана гуманитардык долбоорлорду ишке киргизүү пландалууда.
Белгилей кетсек, ушул күндөрү Өзбекстанда эки өлкөнүн Аймактар форуму жана башка биргелешкен иш-чаралар өтүүдө.