Антониу Гутерриш Америка Кошмо Штаттары менен Ирандын ортосунда тынчтык келишими түзүлгөнү тууралуу билдирүүнү кубаттады. Келишим дароо жана туруктуу ок атышууну токтотууну, Ормуз кысыгы аркылуу кеме каттамын кайра жандандырууну жана мындан аркы сүйлөшүүлөр үчүн негизги алкакты түзүүнү карайт. Бул тууралуу БУУнун расмий сайтында маалымат берилген.
БУУнун басма сөз кызматы жекшемби күнү тараткан билдирүүдө Вашингтон менен Тегерандын ортосунда жетишилген макулдашуу жаңжалды тынчтык жолу менен жөнгө салуу багытындагы маанилүү кадам болушу мүмкүн экени айтылат.
Башкы катчы ошондой эле сүйлөшүү процессин колдогон аймактагы мамлекеттерге ыраазычылык билдирди.
«Башкы катчы тынчтык келишимине алып келген сүйлөшүүлөрдү колдоодогу конструктивдүү ролу үчүн Пакистанга, Катарга, Египетке, Сауд Арабиясына, Түркияга жана аймактагы башка мамлекеттерге терең ыраазычылык билдирет», — деп айтылат билдирүүдө.
БУУнун башчысы жетишилген макулдашуулар кеңири саясий жөнгө салууга негиз болот деген үмүтүн билдирип, ошондой эле узак мөөнөттүү жана ар тараптуу тынчтыкка жетүүгө багытталган аракеттерди колдоого БУУ даяр экенин дагы бир жолу баса белгиледи.
Буга чейин, ошол эле жекшемби күнү өзүнчө билдирүүсүндө Антониу Гутерриш ок атышууну токтотуу режими күчүндө турганына карабастан, Израилдин Бейрут шаарына жасаган соккуларын айыптаган.
Белгилей кетүүчү жагдай, АКШ менен Ирандын бардык фронттордо дароо ок атышууну токтотуу боюнча макулдашууга жетишкени тууралуу билдирүү дүйнөлүк коомчулук тарабынан кубаттоого ээ болууда. Макулдашуу согуштук аракеттерди токтотуу менен катар Ормуз кысыгын кайра ачуу жана АКШ тарабынан Иран портторуна коюлган блокаданы алып салууну да камтыйт.
Бир катар өлкөлөр эки тарапты тең келишимдин бардык шарттарын мүмкүн болушунча тез жана толук аткарууга чакырып, келечектеги кеңири сүйлөшүүлөргө конструктивдүү маанай менен катышууга үндөштү. Ошондой эле бул келишимге жетишүүдө Пакистан менен Катардын ортомчулук ролун да көптөгөн тараптар жогору баалашты.
Келишимге 19-июнда кол коюлары күтүлүүдө.