Израилдик коопсуздук кызматтары Ирандын ракеталык потенциалы мынчалык тез калыбына келе турганын күтүшкөн эмес.
Бул тууралуу Jerusalem Post гезити армиядагы булактарына таянуу менен жазды.
Басылманын маалыматына караганда, апрель айында жаңжалдын негизги этабы аяктагандан кийин израилдик аскерлер Ирандын аскердик-өнөр жай комплексине жасалган соккулар анын өнүгүүсүн бир нече жылга артка калтыра тургандай олуттуу зыян келтирди деп эсептешкен.
Бирок төрт ай өткөндөн кийин Израилдин Коргоо армиясы (ЦАХАЛ) Ирандын ракеталык потенциалы бир нече багытта күтүлгөндөн кыйла тез калыбына келип жатканын белгилеген.
«Израилдин коргоо тармагындагы өкүлдөрү Иран ракеталык арсеналын калыбына келтирүүнүн инновациялык жолдорун таап жатканын моюнга алышууда», — деп жазат Jerusalem Post.
АКШ менен Израиль 28-февралда Ирандын аймагындагы объектилерге сокку урууну баштаган. Иран жооп катары аймактагы АКШнын аскердик объекттерине сокку ура баштаган. Жаңжал болжол менен 40 күнгө созулуп, 8-апрелде ок атышууну токтотуу боюнча келишим менен аяктаган.
Бирок 8-июлга караган түнү АКШ Иранга каршы масштабдуу соккуларын кайрадан баштаган. Иран жооп иретинде Жакынкы Чыгыштагы америкалык аскердик объекттерге чабуул жасаган. Тегеран ошондой эле Вашингтонду согуштук аракеттерди токтотуу боюнча өз ара түшүнүшүү меморандумун бузду деп айыптаган.
Акыркы жумаларда АКШ менен Иран ортомчулардын катышуусунда жаңы келишимдин шарттарын макулдашууга аракет кылып жатышат.