Израилде Палестинанын ХАМАС кыймылынан Газа тилкесинде барымтага алгандарды бошотуу талабы менен миңдеген адамдар иш таштоодо, деп билдирет Би-Би-Си.
1-сентябрдын кечинде демонстранттар Иерусалимдин кире беришин тосуп алышкан. Израилдин борбору Тель-Авивде да он миңдеген жарандар массалык иш таштоого чогулушту. Нааразылык акциялары жана иш таштоо Израил армиясы Газа тилкесинде барымтадагы алты адамдын сөөгүн тапкандан кийин болду.
Демонстранттар Израилдин премьер-министри Биньямин Нетаньяху менен анын өкмөтүн ХАМАС менен келишимди кечеңдетип жатат деп айыпташууда.
Израилдин “Гистадрут” профсоюздар федерациясы дүйшөмбү күнү өлкөдө жалпы иш таштоо жарыялады. Федерациянын башчысы Арнон Бар-Дэвид барымтадагыларды бошотуу боюнча келишим «баардыгынан маанилүүрөөк» экенин айтты.
«Газанын туннелдеринде жөөттөр өлтүрүлүүдө. Муну түшүнүү мүмкүн эмес жана аны токтотуу керек», – деди ал Тель-Авивдеги басма сөз жыйынында.
2023-жылдын 7-октябрында палестиналык ХАМАС тобу Израилге кол салган. Согушкерлер ошондой эле 200дөн ашуун адамды барымтага алып, Газа тилкесине алып кетишкен. Палестиналык туткундарды алмаштыруунун алкагында Израилдин абактарынан барымтадагы 100дөн ашуун адам бошотулду.