Ирандын президенти Масуд Пезешкиан Тегеранда Орусиянын тышкы иштер министри Сергей Лавров менен жолугушууда октябрдын аягында Москвада өтө турган Газ экспорттоочу өлкөлөр форумунун саммитине катышууну жана президент Владимир Путин менен жолугушууну пландап жатканын билдирди.
Пезешкиан 27-октябрда Москвада өтө турган Газ экспорттоочу өлкөлөр форумунун (ГЭӨФ) сегизинчи саммитине катышууну пландап жатат. Бул тууралуу «Интерфакс» агенттиги кабарлады.
«Орусиянын президентине менден да салам айтып коюңуз. Биз да алдыдагы Орусияга болгон сапарыбызды күтүп жатабыз жана жакын арада жолугушабыз деп үмүттөнөбүз», — деди Пезешкиан Лавров менен болгон жолугушууда.
Ал ошондой эле акыркы окуяларга байланыштуу Орусиянын бекем позициясы үчүн Путинге, Орусиянын өкмөтүнө жана элине ыраазычылык билдирди.
Өз кезегинде Лавров Орусиянын лидери Пезешкианды Газ экспорттоочу өлкөлөр форумунун саммитинде күтүп жатканын белгиледи. Ошондой эле Шанхай кызматташтык уюмунун (ШКУ) Бишкекте өткөн саммитинде башталган сүйлөшүүнү улантуу үчүн эки тараптуу жолугушуу өткөрүүгө үмүттөнөрүн айтты.
Эске салсак, Орусиянын тышкы иштер министри Сергей Лавров менен Ирандын президенти Масуд Пезешкиан Тегеранда жолугушуп, эки тараптуу мамилелерди чыңдоо маселелерин талкуулашкан.
Айдын башында Ирандын президенти Жакынкы Чыгыштагы кырдаалга байланыштуу Орусиянын позициясы үчүн Путинге ыраазычылык билдирген.