Россиянын тышкы иштер министри Тажикстан, Түркмөнстан жана Өзбекстан менен чектешкен Ооганстандын аймактарында террордук жана экстремисттик топтордун олуттуу катышуусу сакталып жатканын билдирди.
Радикалдык күчтөр Ооганстанды Борбор Азияга жана Россияга коркунучтарды жайылтуу үчүн плацдарм катары пайдаланууну көздөшүүдө. Бул тууралуу Россиянын тышкы иштер министри Сергей Лавров Борбор Азия жана Ооганстандагы коопсуздук маселелери боюнча Жамааттык коопсуздук келишим уюмунун (ЖККУ), Көз карандысыз Мамлекеттер Шериктештигинин (КМШ) жана Шанхай кызматташтык уюмунун (ШКУ) конференциясында сүйлөп жатып билдирди.
Министрдин айтымында, Тажикстан, Түркмөнстан жана Өзбекстан менен чектешкен Ооганстандын аймактарында, колдо бар маалыматтарга ылайык, террордук жана экстремисттик топтордун олуттуу күчтөрү, алардын машыгуу лагерлери жана таяныч пункттары сакталып турат.
Тема боюнча
БУУ Ооганстанда аялдарга жана ЖМКларга каршы репрессиялар күчөгөнүн билдирди
«Бул топтордун мүчөлөрү Борбор Азия мамлекеттеринин аймагына, анын ичинде качкындардын, атүгүл туристтердин кейпин кийип кирүүгө аракет кылып жатышат», — деп белгиледи министр.
Анын сөзүнө караганда, Россиянын жана анын атайын кызматтарынын баалоосу боюнча, негизги коркунуч эл аралык террордук уюм болуп саналган жана Россияда тыюу салынган «Ислам мамлекети» уюмунун аймактык бөлүмү — «Вилаят Хорасан» тобунун согушкерлеринен келип чыгууда.
«Бул уюм Кабулдагы өкмөттүн өз өлкөсүндө туруктуулукту камсыз кылуу мүмкүнчүлүгүн алсыратууну ачык максат кылып койгон. Ошол эле учурда радикалдар Ооганстанды террордук аракеттерди Борбор Азияга жана Россия Федерациясына жайылтуу үчүн өзүнчө бир плацдарм катары пайдаланууну каалашат», — деди Лавров.
Министрдин маалыматына ылайык, Пянж дарыясынын аркы өйүзүндө, Ооганстандын аймагында, «террордук интернационал» деп атоого боло турган күчтөр топтолгон. Алардын арасында Борбор Азиядан, Түндүк Кавказдан жана уйгур чөйрөсүнөн чыккан согушкерлер бар.
Алар Жакынкы Чыгыштагы жана Африкадагы куралдуу аракеттерге катышуу аркылуу тажрыйба топтошкон. Мындан тышкары, аймакта исламдык радикализм идеологиясын жайылтуучулар, жашыруун медреселер жана маалыматтык мейкиндикте, өзгөчө социалдык тармактарда иштеген үгүт ресурстары бар экенин министр белгиледи.
Лавровдун баалоосунда, Ооганстандагы процесстер аймактык коопсуздукка терс таасирин тийгизүү мүмкүнчүлүгүн дагы деле сактап турат. Айрыкча тышкы күчтөр бул процесстерди Борбор Азиянын жана Россиянын кызыкчылыктарына тиешеси жок өздөрүнүн саясий максаттары үчүн пайдаланган учурда коркунуч күчөшү мүмкүн.
«Биз кырдаалга реалдуу баа берүүгө аракет кылабыз. Ошондуктан АКШ жана НАТОдогу башка өлкөлөр Ооганстанды жыйырма жыл бою натыйжасыз оккупациялагандан кийин калтырган оор мурасты жоюу үчүн дагы узак убакыт талап кылынарын түшүнөбүз», — деп сөзүн жыйынтыктады Лавров.