Ормуз кысыгында мунай ташуучу танкер минага жарылганын ирандык Fars News агенттиги кабарлады.
«Мунай ташуучу танкер деңиз минасына урунгандан кийин Ормуз кысыгында жарылды», — деп айтылат билдирүүдө.
OSINT маалыматына ылайык, минага кабылган танкер Бириккен Араб Эмираттарына таандык болушу мүмкүн.
Кеменин автоматтык идентификациялоо системасы (AIS) болжол менен 18 күндөн бери өчүк болгон. Кемеден акыркы сигнал 26-августта алынган. Андан кийин анын жайгашкан жери тууралуу эч кандай маалымат берилген эмес.
АКШ менен Израиль 28-февралда Ирандагы объектилерге сокку урууну баштаган. Буга жооп катары Иран да аймактагы АКШнын базаларына сокку урган. Июнь айынын ортосунда Тегеран менен Вашингтон согуштук аракеттерди токтотуу боюнча меморандумга кол коюшкан. Бирок кийинчерээк тараптар кайрадан бири-бирине сокку урушкан. Учурда жаңжал жөнгө салына элек.
Ирандын Ислам революциясынын сакчылар корпусу сентябрь айында Тегеран Ормуз кысыгынын чыгыш тарабында кемелердин жүрүүсүнө тыюу салынган аймак киргизип жатканын билдирген. Бул аймак аркылуу өтүү үчүн кемелер Тегеран менен алдын ала макулдашууга тийиш экени айтылган.