Буга чейин Мамдани Израилдин премьер-министри Нью-Йоркко келген учурда аны кармоонун мыйзамдуулугу боюнча маселени иликтеп жатканын айткан. Ал өз билдирүүсүндө Гаагадагы Эл аралык кылмыш соту Нетаньяхуга каршы согуш кылмыштарына байланыштуу айыптарды койгонун эске салган.
«Менин администрациям колдонуудагы мыйзамдардын алкагындагы бардык мүмкүн болгон укуктук жолдорду изилдеп чыгып, эгер Биньямин Нетаньяху Нью-Йоркко келсе, шаар бийлиги Эл аралык кылмыш сотунун камакка алуу ордерин аткара алабы деген маселени карады. Бирок, албетте, бул ордерди өз алдынча аткарууга биздин юридикалык ыйгарым укугубуз жок», — деди Мамдани X социалдык тармагына жарыяланган видео кайрылуусунда.
Мэр ошондой эле АКШнын федералдык өкмөтүн бул ордерди аткарууга чакырды.
2024-жылдын ноябрь айынын аягында Эл аралык кылмыш соту (МУС) Израилдин премьер-министри Биньямин Нетаньяхуга жана өлкөнүн мурдагы коргоо министри Йоав Галантка каршы Газа тилкесиндеги согуш кылмыштарына байланыштуу камакка алуу ордерлерин чыгарган.
Бирок АКШнын президенти Дональд Трамп Нетаньяхуну өлкө аймагында кармоо мүмкүнчүлүгүн толугу менен жокко чыгарган. Ал өзүнүн Truth Social платформасында жарыялаган билдирүүсүндө Нетаньяху “АКШнын аймагында жүргөндө эч кандай шартта, эч кандай формада жана эч кандай жол менен камакка алынбайт” деп жазган.
Буга чейин шайлоо алдындагы өнөктүк учурунда Зохран Мамдани Израилдин премьер-министри Нью-Йоркко келген учурда аны камакка аларын убада кылган.