Индиянын Улуттук Конгресси (INC) өлкөнүн бийликтеги Бхаратия Жаната партиясын (BJP) мусулмандардын жамаатына каршы тынымсыз репрессия жүргүзүп жатат деп айыптап, мындай аракеттер мыйзам үстөмдүгүнө жана Конституцияга орой шек келтирерин билдирди.
Caliber.Az басылмасы индиялык Deccan Herald гезитине шилтеме берүү менен билдиргендей, оппозиция ошондой эле үйлөрү бузулган жарандарга тийиштүү өлчөмдө компенсация төлөп берүүнү жана имараттарды бузууга тиешеси бар кызмат адамдарын жоопкерчиликке тартууну талап кылды.
Бул билдирүүлөр өткөн жумада Мадхья-Прадеш штатындагы Харгон шаардык соту 2022-жылы индуисттердин Рам Навами майрамы учурунда болгон башаламандык боюнча айыпталган 11 адамды актап чыккандан кийин жасалды. Сот айыпталуучуларга каршы ишенимдүү далилдер да, күбөлөр да жок экенин жана мыйзамдуу иликтөө жүргүзүлбөгөнүн белгиледи. Ошого карабастан, BJP партиясынын «бульдозердик адилеттиги» буга чейин эле ишке ашырылган.
INC партиясынын башкы катчысы Жайрам Рамеш BJP башкарган штаттарда мусулмандардын жамааты дайыма бутага алынып жатканын айтып, бульдозер менен жүргүзүлгөн операциялар диний жайларга, билим берүү мекемелерине жана жеке турак үйлөргө каршы багытталганын белгиледи.
Анын айтымында, мындай аракеттер мыйзам үстөмдүгүнө да, Конституцияга да одоно шек келтирет.
«BJP өкмөтү үйлөрү бузулган бардык адамдардын алдында жооп бериши керек. Аларга тийиштүү компенсация төлөнүп, бул ишке тиешеси бар кызмат адамдары жоопкерчиликке тартылышы зарыл», — деди Рамеш.
Ошол эле учурда индиялык The News Mill басылмасы INC партиясынан депутат Прамод Тивари BJP жана ага байланыштуу уюмдарды коомду бөлүп-жарууга багытталган, британ колониялык башкаруусун эске салган саясат жүргүзүп жатат деп айыптаганын жазды. Анын айтымында, бийлик оппозицияны алсыратуу үчүн диний негизде коомго жик салууга аракет кылууда.
Индиядагы саясий кырдаал тууралуу сөз кылган Тивари азыркы бийликтин саясатын британ доорундагы башкаруу менен салыштырды.
«BJP партиясы бир кезде британдыктар кандай аракет кылса, дал ошондой аракет кылууда. Британиялыктар индустар менен мусулмандардын ортосуна жик салып, Индиянын эркиндик үчүн күрөшүн алсыратууга аракет кылышкан. Бүгүнкү күндө да бийликтеги партия оппозицияны алсыратуу жана капитализмге каршы күрөштү солгундатуу үчүн өлкөнү диний белгилер боюнча бөлүп жатат», — деди Тивари.
Ал ошондой эле өлкөнүн «байлыгын талап-тоноого» каршы кыймыл күчөп жатканын жана адамдар BJP жетектеген өкмөттүн саясатына каршы биригип жатканын белгиледи.
Махатма Гандинин мурасына токтолгон Тивари мындай деди:
«Махатма Ганди ар кандай диний жамааттардын өкүлдөрүн бириктирген. Бүгүнкү күндө да INC партиясы индустарды, мусулмандарды, сикхтерди жана христиандарды өлкөнүн өнүгүшү үчүн бириктирүүгө жана улутту бөлүп-жарууга аракет кылып жаткан BJP партиясына каршы турууга умтулууда», — деди ал.
Котормочу: Фарах Мамедли