Вашингтондун Иранга экономикалык басым көрсөтүүнү баштаганын жарыялашы — АКШдагы ички көйгөйлөрдөн көңүлдү башка жакка буруу аракети болуп саналат жана бүткүл дүйнөлүк каржы системасына коркунуч туудурат.
Бул тууралуу Ирандын тышкы иштер министри Аббас Арагчи билдирди.
Буга чейин АКШ президенти Дональд Трамп Иранга каршы болуп көрбөгөндөй экономикалык операция башталганын жарыялаган. Ал өзү жарыялаган Иранга каршы «экономикалык согуш жана обочолонтуунун» башталышын 1944-жылдын 6-июнунда союздаш күчтөрдүн Нормандияга десант түшүрүүсү менен салыштырган. Бул күн Батыш маданиятында «Д күнү» (D-Day) деген ат менен белгилүү.
«Экономикалык “D-Day” деп аталган бул кадам — Америкадагы өзүнүн кризисинен, тактап айтканда, болуп көрбөгөндөй мамлекеттик карыздан жана пайыздык чендердин тездик менен өсүшүнөн көңүлдү алаксытуу аракети. АКШнын каржылык терроризми дүйнөлүк экономикага жана бүткүл дүйнөдөгү мамлекеттердин эгемендигине коркунуч жаратууда», — деп жазды Арагчи X социалдык тармагындагы баракчасына.
Буга чейин Трамп ошондой эле Тегеранга колдоо көрсөткөн каржы мекемелери, ишканалар, аэропорттор же мамлекеттик түзүмдөр жайгашкан өлкөлөр АКШ тарабынан олуттуу экономикалык кесепеттерге туш болорун эскерткен.
Июнь айынын ортосунда АКШ менен Иран тынчтык келишимин түзүү процессин баштоого багытталган меморандумга кол коюшкан. Бирок үч жумадан кийин чыңалуунун жаңы этабы башталган. АКШ Иранды Ормуз кысыгындагы соода кемелерине ок аткан деп айыптап, Иранга каршы чабуул жасаган. Иран жооп катары аймактагы бир катар америкалык аскердик объекттерге сокку урган.
Акыркы апталарда Жакынкы Чыгыштагы ортомчулардын катышуусунда тараптар жаңжалды токтотууга багытталган жаңы келишимдин шарттарын макулдашууга аракет кылышкан. Бирок бул аракеттерден азырынча майнап чыга элек.