Ирактагы «Садр» кыймылынын лидери Муктада ас-Садр АКШ аскерлерин Ирактан чыгаруу мөөнөтү катары 30-сентябрдын белгиленишин кубаттап, Вашингтонду Багдаддын чечимин урматтоого жана өлкөнүн ички иштерине кийлигишпөөгө чакырды.
Бул тууралуу IRNA агенттиги «Шафак Ньюс» агенттигине таянып билдирди.
Ас-Садр билдирүүсүндө америкалык жана эл аралык коалициянын күчтөрүнүн Ирактан чыгарылышын Ирак, АКШ үчүн жана ал тургай бүткүл дүйнө үчүн пайдалуу болорун айтты.
Ошондой эле ал бул кадам Ирактын ички иштерине чет элдик кийлигишүүлөрдүн жана өлкөнүн эгемендигине жана көз карандысыздыгына шек келтирүүнүн аякташынын башаты болот деген үмүтүн билдирди.
Ал чет мамлекеттерге Ирактын ички иштерине кийлигишүүнүн кесепеттери тууралуу эскертип, кайсы гана мамлекет болбосун Ирактын иштерине кийлигишүүнүн бардык түрүнө катуу каршы экенин баса белгиледи.
«Садр» кыймылынын лидери ошондой эле Ирак өзүн коопсуздук күчтөрүнүн, өзгөчө чек ара күчтөрүнүн жана аба күчтөрүнүн жардамы менен жана борбордук өкмөт аркылуу гана коргой аларын белгиледи.
Анын айтымында, Ирактын эли курамындагы айырмачылыктарга карабастан, кандай гана тышкы кийлигишүү болбосун, ага каршы «биримдикте» турат.
Ас-Садр 30-сентябрь Ирактын гүлдөп-өнүгүшүнүн башталышы болуп, ошол эле учурда «коррупциянын, зулумдуктун, диктатуранын, оккупациянын жана терроризмдин» аякташын шарттайт деген үмүтүн билдирди. Ошондой эле өлкөнүн коопсуздук органдары куралдуу күчтөрдүн башкы командачысынын жетекчилиги алдында бекемделиши керектигин белгиледи.
Ал билдирүүсүнүн соңунда өзү жетектеген кыймыл чет элдик колдоосуз эле «оккупацияга, терроризмге жана коррупцияга» каршы күрөшүп келгенин белгиледи.
АКШ Ирактын аймагынан аскерлерин чыгара баштады. Америкалык аскерлер өлкөдөн толугу менен 30-сентябрга чейин чыгып кетиши керек.
АКШ Иракка аскерлерин 2003-жылы киргизген. Associated Press (AP) агенттигинин маалыматына караганда, 2007-жылы америкалык аскерлердин саны эң жогорку чекке жетип, Иракта болжол менен 170 миң аскер кызматкери болгон.
Кийин Барак Обаманын администрациясы америкалык аскерлердин санын кыскартуу боюнча чечим кабыл алган. Натыйжада 2011-жылдын декабрына карата Иракта америкалык аскер кызматкерлеринин аз гана бөлүгү калган.
Бирок 2014-жылы «Ислам мамлекети» террордук тобунун күч алышына байланыштуу АКШ аскерлерин кайра жөнөтүү чечимин кабыл алган. АКШнын Ирактагы согуштук миссиясы расмий түрдө 2021-жылы аяктаган.
2024-жылы АКШ менен Ирак өлкөдөгү эл аралык коалициянын миссиясын толук аяктоо боюнча макулдашууга жетишкен.
АКШ аскерлери өткөн жылы Ирактын көпчүлүк аймактарындагы аскердик базалардан чыгып кеткен. Бирок Ирак Күрдистан аймагында аскердик катышуусун сактап калган.