«Ишеним — бул жок нерсе. Батыш өлкөлөрү айтып жаткан адам укуктары сыяктуу эле, көптөгөн эл аралык нормалар да сакталбай жатат», — деди Ирандын президенти Масуд Пезешкиан.
Ирандын президенти Масуд Пезешкиан БУУнун «Ишенимди калыбына келтирүү» деген ураанына токтолуп, ишеним жок экенин, ошондой эле Батыш өлкөлөрү айтып келген адам укуктары жана көптөгөн эл аралык нормалар сакталбай жатканын билдирди.
Иран президентинин администрациясынын жазуу жүзүндөгү билдирүүсүнө ылайык, Пезешкиан БУУнун Башкы Ассамблеясынын 81-сессиясына катышуу үчүн Нью-Йоркко учуп кетер алдында аэропортто билдирүү жасаган.
«Ишеним — бул жок нерсе. Алар айтып жаткан адам укуктары сыяктуу эле, көптөгөн эл аралык нормалар да көз жаздымда калууда», — деди ал.
Пезешкиан БУУнун трибунасынан Иранга жасалган чабуулдар жана иран элинин «акыйкаттыгы» тууралуу айтып берерин билдирди. Ошондой эле анын айтымында, «душман» өзгөчө Палестина менен Сирияга каршы чабуулдарын улантууда.
Мындан тышкары, Пезешкиан АКШ Ирандык журналисттер тобуна виза бербей койгонун, анткени алар жасаган «кылмыштары» ачыкка чыгып кетишинен кооптонуп жатканын айтты. Ошол эле учурда ал өз өлкөсүнүн үнүн Нью-Йоркто иштеп жаткан эл аралык маалымат каражаттары аркылуу жеткирерин белгиледи.
Пезешкиандын айтымында, АКШ менен Израиль согуш аркылуу Иранды багынууга мажбурлай алган жок. Анын билдирүүсүндө, бул өлкөлөр эми өз максатына кургактык жана деңиз блокадасы, жалпыга маалымдоо каражаттары жана Ирандын алсыз жактарын пайдалануу аркылуу жетүүгө аракет кылып жатышат.