27-сентябрда Ооганстан менен Пакистандын чек арасында жаңы оор кагылышуулар болду. Артиллерия, миномёттор жана башка оор куралдар колдонулган атышуулар чек аранын бир нече тилкесинде — Ооганстандын Пактия жана Нангархар провинцияларында, ошондой эле Пакистандын Куррам районунда бир убакта жүрдү. Жергиликтүү тургундар бир нече саатка созулган аткылоолор болгонун, андан кийин 27-сентябрдын таңына карай кырдаал убактылуу тынчыганын билдиришти. Бул тууралуу Khaama Press маалымдады.
Тараптар кагылышуулардын себептерин ар башкача түшүндүрүшүүдө. Пакистандык булактардын билдиришинче, аскердик позицияларга жана калктуу аймактарга ок атууну «Талибан» күчтөрү баштап, андан кийин Пакистандын армиясы жооп иретинде сокку урган. Исламабад ошондой эле буга чейин Ооганстандын Кандагар, Пактия жана Хост провинцияларындагы он объектке сокку урганын билдирди. Пакистан тараптын версиясы боюнча, ал объектилер учкучсуз учуучу аппараттарды учуруу жана сактоо үчүн колдонулган. Кабул бул айыптоолорду четке кагып, Пакистандын соккуларынан төрт жай тургун каза болгонун билдирди.
Жаңы зомбулук эки өлкөнүн мамилеси тез начарлап жаткан шартта орун алды. Пакистан Ооганстандын аймагынан куралдуу топтор, анын ичинде «Техрик-и-Талибан Пакистан» (TTP) иш алып барып жатканын Ооганстандын бийлигин айыптап келет. Пакистандын премьер-министри Шехбаз Шариф бул тууралуу 26-сентябрда БУУнун Башкы ассамблеясында айтып, Кабул бийлигин Ооганстандын аймагын Пакистанга кол салуулар үчүн колдонууга каршы «текшерүүгө мүмкүн болгон жана чечкиндүү чараларды» көрүүгө чакырган. Бул тууралуу Amu TV жазды.
Ушул шартта Нуристан провинциясында өзүнчө окуя болуп, ал жердеги салгылашуулар тууралуу маалыматтар өзгөчө карама-каршы чыкты
27-сентябрда талибдердин Коргоо министрлиги Камдеш районунда Пакистан тараптан Дюранд сызыгынан өтүүгө аракет кылган куралдуу топ талкаланганын билдирди. Ведомствонун версиясы боюнча, топтун курамында «Ислам мамлекети» менен байланышы бар согушкерлер, ошондой эле Ооган армиясынын мурдагы аскер кызматкерлери болгон. Кабул алардын Пакистандын колдоосу менен аракеттенгенин билдирүүдө.
Алгач Нуристандын полициясы 21 адам каза болуп, 32 адам кармалганын билдирген. Бир нече сааттан кийин Коргоо министрлиги каза болгондордун санын 28ге көбөйтүп, туткундардын санын 32 бойдон калтырган. Бул тууралуу Pajhwok Afghan News маалымдады.
Ооганстандын Коргоо министрлигинин версиясы боюнча, топтун мүчөлөрү буга чейин Пакистандын атайын кызматтары тарабынан башпаанек алууга жана чет өлкөдө жогорку маяналуу жумушка орношууга жардам берүү убадасы менен Пакистанга чакырылган. Андан кийин, Кабулдун билдиришинче, алар Пакистандын армиясынын жана ведомстволор аралык чалгын кызматы ISIнин лагерлерине жеткирилип, ал жерде аскердик даярдыктан өтүшкөн. Кийин алар Нуристанга жөнөтүлгөн.
Ооганстандык ведомство ошондой эле топтун арасында пакистандык аскер кызматкерлери, Пакистан менен байланышкан куралдуу түзүмдөрдүн өкүлдөрү жана «Ислам мамлекети» тобунун согушкерлери болгонун билдирүүдө. Бирок алар кагылышуу башталгандан кийин аймактан чыгып кеткени айтылат.
Өз кезегинде Пакистан бул айыптоолорду четке какты. Өлкөнүн Маалымат министрлиги Кабулдун билдирүүлөрүн негизсиз деп атап, Пакистандын күч түзүмдөрү менен чалгын кызматтары Нуристандагы салгылашууларга катышпаганын, Ооганстандын мурдагы аскер кызматкерлерин жалдабаганын жана даярдабаганын, ошондой эле «Ислам мамлекетине» же башка куралдуу топторго жардам көрсөтпөгөнүн билдирди.
Ошол эле учурда Исламабад Ооганстандын бийлигинен Пакистандын айтымында, Ооганстандын аймагынан иш алып барган куралдуу топторго каршы чара көрүүнү кайрадан талап кылды. Бул тууралуу Al Jazeera маалымдады.
Бирок Ооганстандын Коргоо министрлигинин версиясы Ооганстандын өзүндөгү жалгыз версия эмес.
Ооганстан эркиндик фронту (Afghanistan Freedom Front, AFF) — талибдерге каршы куралдуу уюм — Amu TV басылмасына окуянын таптакыр башкача болгонун билдирди.
Фронттун версиясы боюнча, кагылышуу куралдуу топтун Пакистандан Ооганстанга кирүүгө аракетинен эмес, Талибан күчтөрүнүн Камдештеги AFF позицияларына жасаган чабуулунан кийин башталган. Фронт талибдер жердеги бөлүктөрдү жана бир нече учкучсуз учуучу аппараттарды колдонгонун билдирүүдө.
AFF Талибан тараптан беш адам каза болуп, он адам жаракат алганын билдирди. Мындан тышкары, уюм өзүнүн согушкерлери бир нече блокпостту басып алып, Нуристандын Камдеш районунда жана коңшу Кунар провинциясынын Нари районунун айрым аймактарында көзөмөл орнотконун маалымдады.
Фронттун билдирүүсүнө ылайык, курал-жарак жана аскердик жабдуулар да колго түшүрүлүп, Талибанга таандык бир нече учкучсуз учуучу аппарат жок кылынган же иштен чыгарылган.