Иран Евразия экономикалык биримдигин (ЕАЭБ) аймактык кызматташтыкты өнүктүрүү үчүн эң маанилүү аянтчалардын бири деп эсептейт. Анын мүмкүнчүлүктөрү өнөктөш өлкөлөрдүн дараметин толук ачып, аларды биргелешип өнүктүрүүгө өбөлгө түзө алат.
Бул тууралуу Ирандын биринчи вице-президенти Мохаммад Реза Арефтин ЕАЭБ өлкөлөрүнүн өкмөттөр аралык кеңешинин жыйынынын катышуучуларына жолдогон куттуктоо кайрылуусунда айтылат.
«Иран ЕАЭБди аймактык кызматташтыкты өнүктүрүү үчүн эң маанилүү аянтчалардын бири катары карайт. Биздин милдетибиз — колдо болгон мүмкүнчүлүктөрдү соодага, инвестицияларга жана биргелешкен өнүгүүгө айландыруу», — деп белгилеген Ареф.
Анын кайрылуусун Ирандын Беларустагы элчиси Мохсен Омидзамани окуп берген.
Ареф 2025-жылдын май айынан тартып күчүнө кирген ЕАЭБ менен Ирандын ортосундагы эркин соода жөнүндө макулдашуу өлкөгө өнүгүү үчүн жаңы мүмкүнчүлүктөрдү түзгөнүн белгилеген.
Анын айтымында, Иран соода тармагында ЕАЭБдин «активдүү, ишенимдүү жана узак мөөнөттүү өнөктөшү» болууга даяр.
Ареф тараптар энергетика жана транспорт тармактарындагы биргелешкен долбоорлорго да өзгөчө көңүл бурушу керек деп эсептейт.
Ал Иран өзүнүн инфраструктурасы жана географиялык жайгашуусу аркылуу Евразиядагы соода үчүн негизги транзиттик түйүндөрдүн бирине айлана аларын баса белгиледи.