Россиянын тышкы иштер министри Сергей Лавров 19-октябрда Тегеранга жумушчу сапар менен барат. Бул тууралуу Россиянын Тышкы иштер министрлигинин расмий өкүлү Мария Захарова билдирди.
«19-октябрда Россиянын тышкы иштер министри Лавров Тегеранга жумушчу сапар менен барат. Ал Ирандын тышкы иштер министри менен сүйлөшүүлөрдү өткөрөт», — деди Захарова брифинг учурунда.
Анын айтымында, сүйлөшүүлөрдүн жүрүшүндө эл аралык жана аймактык күн тартибиндеги актуалдуу маселелер кеңири талкууланат. Негизги көңүл Ирандын айланасындагы кырдаалга жана Россия тараптан чыңалууну басаңдатуу үчүн көрүлүп жаткан чараларга бурулат.
Захарова белгилегендей, Россиянын Жакынкы жана Ортоңку Чыгыштагы дос мамлекеттери АКШ менен Израилдин аракеттеринен улам чыңалган кырдаалга тартылган.