Ирандын Орусиядагы элчиси Казем Жалали Ирандын президенти Масуд Пезешкиандын Орусияга боло турган сапарынын программасы тууралуу кеңири маалымат берди.
Ирандын Орусиядагы элчиси Казем Жалали РИА Новости агенттигине билдиргендей, Ирандын президенти Масуд Пезешкиан шейшемби күнү, 27-октябрда, Москвада өтө турган Газ экспорттоочу өлкөлөр форумунун (ГЭӨФ) саммитине катышат.
Ирандын элчиси бул тууралуу мындай деп билдирди:
«Иран Ислам Республикасынын президенти Газ экспорттоочу өлкөлөр форумунун саммитине катышуу үчүн Москвага барат. Саммит шейшемби күнү, 27-октябрда өтөт. Учурда биз бул сапардын чоо-жайын макулдашып жатабыз».
Жалали кошумчалагандай, талкуунун негизги темалары Иран менен Орусиянын ортосундагы экономикалык жана соода кызматташтыгы, анын ичинде «Түндүк — Түштүк» транспорттук коридору, энергетикалык коопсуздук, азык-түлүк коопсуздугу жана соода мамилелерин өнүктүрүү маселелери болот.
Ошондой эле эки өлкөнүн президенттери геосаясий, эл аралык жана саясий маселелер боюнча пикир алмашат.
Орусиянын тышкы иштер министри Сергей Лавров да 19-октябрда Тегеранга жасаган сапары учурунда Владимир Путин октябрдын аягында Москвада өтө турган Газ экспорттоочу өлкөлөр форумунун саммитинин алкагында Масуд Пезешкиан менен жолугушууну каалап жатканын билдирген.