АКШнын вице-президенти Жей Ди Вэнс Украинанын президенти Владимир Зеленскийден Каспий куур консорциумунун (КТК) инфраструктурасына сокку урууну токтотууну жеке өзү талап кылган.
Бул тууралуу Financial Times басылмасы билдирди.
Маалыматка караганда, мындан кийин Киев Новороссийск портундагы терминалдын жанында турган танкерлерге чабуул жасаган эмес.
«Биз америкалык өнөктөштөрүбүздүн сөзүнө абдан кылдат кулак салабыз», — деп билдирген украиналык аткаминер.
Басылманын маалыматына караганда, Каспий деңизиндеги мунай долбоорлорунун үлүштөрүнө бир катар америкалык компаниялар, анын ичинде энергетикалык гиганттар Chevron жана ExxonMobil ээлик кылат. Алар Тенгиздеги ири мунай кендеринин тиешелүүлүгүнө жараша 50% жана 25% үлүшүнө ээ.
Мындан тышкары, Каспий деңизинин акваториясы Казакстандан Европанын рынокторуна товарларды ташуу үчүн пайдаланылат. Ормуз кысыгынын жабылышынан кийин казак мунайы Европа жана АКШ рыноктору үчүн өзгөчө маанилүү болуп калган.
Ошондой эле Вэнс Кара деңиздеги Орусияга тиешеси жок кемелерге сокку урууну токтотууну талап кылган.
Украинанын бийлиги чабуулдардан убактылуу баш тартууга макул болгон. Басылманын булагынын айтымында, Киев Patriot ракетадан коргонуу системалары үчүн кармоочу ракеталарды өндүрүүгө лицензия алуу максатында Ак үйгө айрым жеңилдиктерге барууга даяр.
Июль айында Украинанын Куралдуу күчтөрү Каспий куур консорциумунун (КТК) аймагына жакын жерде мунай ташуучу танкерлерге үч жолу чабуул жасаган. Акыркы чабуул 30-июлда болуп, анда эки танкер жабыркаган.
Каспий куур консорциуму Казакстандын батышындагы кендерден өндүрүлгөн мунайды Кара деңиздеги Новороссийск портуна жеткирген негизги экспорттук багыт болуп эсептелет. Каспий куур консорциуму кууру аркылуу Казакстандын экспорттолуучу мунайынын болжол менен 80 пайызы ташылат. Ошондуктан КТКдагы иштин үзгүлтүккө учурашы өлкөнүн мунай экспортунун көлөмүнө жана багыттарына түздөн-түз таасир этет.