Мәскеу мен Тегеран санкцияларды айналып өту жолдарын іздестірумен қатар, санкцияларға қарсы зияткерлік және дипломатиялық науқан бастауға да талпыныс жасауда.
АҚШ-тың «Демократияны қорғау қоры» (FDD) сараптамалық орталығы Ресей үкіметінің жарияланбаған құжатына сілтеме жасай отырып, Мәскеу мен Тегеран арасындағы қарым-қатынастардың жекелеген ретсіз бастамалар деңгейінен шығып, екі үкімет те басқаратын стратегиялық әрі жүйеленген сипатқа ие болып жатқанын атап өтті. Сараптамалық орталықтың пікірінше, бұл құрылым Иран мен Ресейдің Батыс тарапынан жасалатын қысым мен санкцияларға төтеп беру қабілетін арттыруы мүмкін.
Израильді жақтайтын сараптамалық орталықтың есебі біраз уақыт бұрын Fox News хабарлаған 2024-2026 жылдарға арналған Ресейдің Иранмен ынтымақтастық жөніндегі 44 беттік жол картасына негізделген.
Құжат Ресейде 2024 жылдың қыркүйегінде бекітіліп, «ресми пайдалану үшін» деп белгіленген.
Құжат министрліктерді, мемлекеттік мекемелерді, орталық банктерді, реттеуші органдарды және мемлекеттік компанияларды қаржы, энергетика, ядролық энергетика, көлік және авиация салаларындағы бірқатар бірлескен жобаларға тартуды көздейді.