Қазақстандық ұлттық компанияның баспасөз қызметі хабарлағандай, QazaqGaz және «Газпром Кыргызстан» газ компаниялары екіжақты меморандумға қол қою арқылы газ инфрақұрылымына қызмет көрсету және оны дамыту саласындағы ынтымақтастық туралы уағдаласты.
«Меморандумға қол қою компанияларымыз арасындағы практикалық ынтымақтастықты нығайтуға қосымша мүмкіндіктер ашады. Тәжірибе және озық техникалық шешімдермен алмасу өндірістік процестерді жетілдіруге, сондай-ақ газ инфрақұрылымының жұмыс істеу сенімділігі мен қауіпсіздігін арттыруға мүмкіндік береді», — деді QazaqGaz басшысы Әлібек Жамауов.
Құжат табиғи газды тасымалдау, бөлу және есепке алу, сондай-ақ газ инфрақұрылымы нысандарын пайдалану мен оларға қызмет көрсету, заманауи технологияларды енгізу және өнеркәсіптік қауіпсіздікті арттыру салаларындағы ынтымақтастық пен тәжірибе алмасуды дамытуды көздейді, делінген хабарламада.
Тараптар газ желілерінің сенімділігі мен қауіпсіздігін арттыруға, технологиялық процестерді жетілдіруге, сондай-ақ цифрландыру мен диспетчерлік басқаруды дамытуға ерекше назар аударады.
«Екі мемлекет мамандардың өндірістік нысандарға өзара сапарларын ұйымдастыруды, техникалық кеңестер, бірлескен жұмыс кездесулері мен оқыту сабақтарын өткізуді, сондай-ақ төтенше жағдайлардың алдын алу және оларға ден қою саласында тәжірибе алмасуды көздеп отыр», — дейді компания.