Ирандын армиясынын кол башчысы, генерал Амир Хатами АКШнын Ормуз кысыгы, ошондой эле Перс жана Оман булуңдары аркылуу өтүүгө укугу жок экенин билдирди.
Анын айтымында, Ормуз кысыгына байланыштуу маселени жөнгө салуу Вашингтон менен аскердик жаңжалды токтотуунун зарыл шарттарынын бири болуп саналат.
«Америкалык аскерлер чыгарылды жана мындан ары алардын Перс булуңуна, Оман булуңуна, ошондой эле Ормуз кысыгына кирүүсүнө уруксат берилбейт. Баары түшүнүшү керек: америкалык базалар эч качан мурдагы абалына кайтып келе албайт. Иран буга эч качан жол бербейт», — деди Хатами. Анын сөздөрүн Ирандын мамлекеттик телерадиокомпаниясы IRIB келтирди.
Генерал ошондой эле Ормуз кысыгы Иран үчүн геосаясий мүмкүнчүлүк экенин белгилеп, бул суу жолундагы кырдаал мурдагы абалына эч качан кайтып келбей турганын айтты.
«Бул рычаг (Ормуз кысыгы — ред.) АКШ менен согушту токтотуунун зарыл шарттарынын бири», — деп кошумчалады Хатами.
Буга чейин Сауд Аравиясынын Al-Hadath телеканалы Иран менен Омандын ортосунда Ормуз кысыгын кеме каттамдары үчүн толугу менен ачуу боюнча келишим түзүлгөнүн билдирген. Маалыматка ылайык, келишимди Ирандын Жогорку улуттук коопсуздук кеңеши бекитиши керек. Телеканал келишим тууралуу расмий маалымат жакынкы күндөрү жарыяланарын билдирген.
Акыркы апталарда Вашингтон менен Тегеран Жакынкы Чыгыштагы ортомчулардын катышуусунда жаңжалды токтотуу үчүн жаңы келишимдин шарттарын макулдашууга аракет кылып жатышат.