Тажикстан Ооганстандын Тажикстандын Тоолуу Бадахшан автоном облусунун (ТБАО) Дарваз району менен чектеш аймагында болгон куралдуу кагылышууларга байланыштуу ооган тарапка нааразылык билдирди. Анын кесепетинен Тажикстандын жергиликтүү тургуну каза болгон.
Бул тууралуу ТАСС агенттигине Тажикстандын Тышкы иштер министрлигинин маалымат жана басма сөз башкармалыгы билдирген.
Тажикстандын ТИМи акыркы күндөрү Ооганстандын Бадахшан провинциясында болуп жаткан куралдуу кагылышуулар Тажикстандын чек арага жакын аймактарынын коопсуздугуна коркунуч жаратып, эл аралык укуктун нормаларын бузганын белгилеген.
«Тажикстандын аба мейкиндигинин бузулушуна, жергиликтүү тургундардын турак жайларынын жабыркашына жана өзгөчө Тажикстандын Дарваз районунда жай тургундун каза болушуна байланыштуу ооган тарапка нааразылык нотасы жөнөтүлдү», — деп айтылат Тажикстандын ТИМинин билдирүүсүндө.
Министрлик Тажикстан чечкиндүү нааразылык билдирүү менен гана чектелбестен, ооган тараптан бул маселеге олуттуу мамиле кылууну, Тажикстандын мамлекеттик чек арасынын кол тийгистигин сактоону жана мындай окуялардын кайталанышына жол бербөө үчүн натыйжалуу чараларды көрүүнү талап кылганын билдирди.
Тажикстандын Тоолуу Бадахшан автоном облусунун Дарваз жана башка райондору менен чектешкен Ооганстандын Бадахшан провинциясында акыркы убакта өлкөнү башкарып жаткан «Талибан» кыймылы менен анын каршылаштарынын ортосундагы куралдуу кагылышуулар күчөдү.
Жергиликтүү маалымат каражаттарынын билдирүүсүнө караганда, 13-августта Пянж дарыясынын ооган жээгинен атылган ок Тажикстандын Дарваз районундагы Даштак айылынын тургунунун өмүрүн алган.