АКШнын мурдагы мамлекеттик катчысы Энтони Блинкен аймактагы өлкөлөрдүн Иранга карата мамилеси өзгөрүп жатканын белгилеп, Перс булуңунун жээгиндеги бардык мамлекеттер Тегеран менен сүйлөшүүлөрдү жүргүзүүгө жана, балким, келишимге жетишүүгө умтулуп жатканын билдирди.
Бул тууралуу IRNA агенттиги Clash Report сайтына шилтеме берүү менен маалымдады.
Блинкен Bloomberg агенттигине берген маегинде: «Перс булуңундагы өлкөлөр Иран менен сүйлөшүүлөрдү жүргүзүүгө жана, балким, Тегеран менен келишимге жетишүүгө умтулуп жатышат», — деген.
Ал бул өлкөлөр Тегеран менен келишим түзүүгө аракет кылып жатышканын, анткени АКШ аларды коргой албай турганын түшүнүшкөнүн белгилеген.
АКШнын мурдагы мамлекеттик катчысы ошондой эле өлкө президенти Дональд Трамптын азыркы туңгуюктан чыгууга карата чечкиндүүлүгүнө шек санап жатканын айтып, учурдагы кризистен чыгуу үчүн Иран менен дипломатиялык келишимге жетишүү зарыл экенин билдирген.
«Бул Трамптын администрациясы Тегеранга белгилүү бир жеңилдиктерди бериши керек дегенди билдирет. Бул Вашингтон үчүн жеңилүү катары кабыл алынат. Менимче, Трамптын чечкинсиздиги дал ушундан келип чыгууда», — деген Блинкен.
Ал Иран менен согушту «эртең эле токтотуу керек» экенин баса белгилеген.
«Биз келтирген бардык зыянга карабастан, алардын арсеналдарында дагы эле көптөгөн [куралдар] бар жана алар дагы эле аларды өндүрүп жатышат. Бул кырдаалдан чыгуунун жакшы аскердик жолу жок. Дипломатия зарыл», – деди мурдагы мамлекеттик катчы.
Блинкен буга чейин да АКШ менен Израилдин Иранга каршы биргелешкен аскердик аракеттерине токтолуп, Иранга каршы аскердик күч колдонуу эң мыкты чечим болбогонун айткан.
Блинкен Германиянын мурдагы канцлери Олаф Шольц да катышкан маегинде АКШнын буга чейинки администрацияларында Иранга каршы аскердик вариантты колдонуу маселеси көп жолу талкууланганын билдирген. Анын айтымында, бул маселе Барак Обаманын президенттик мезгилинде да каралган.
«Биз да Иранга карата аскердик вариантты абдан кылдат карап чыкканбыз. Бирок азыр күбө болуп жаткан айрым окуялардан улам бул вариант эң мыкты чечим эмес деген тыянакка келгенбиз», — деген Блинкен.
Ал ошондой эле жаңы сурамжылоонун жыйынтыгына токтолуп, АКШнын европалык өнөктөштөрүнүн арасындагы аброю кыйла төмөндөгөнүн билдирген. Анын айтымында, Германиянын жарандарынын 70 пайызы АКШны «душман» же «атаандаш» катары көрөт.
Блинкен эгер мындай сурамжылоо мындан эки жыл мурда, АКШнын мурдагы президенти Жо Байдендин тушунда жүргүзүлгөн болсо, анын жыйынтыгы кыйла башкача болмок деп белгилеген.