«SEASPARK-26» машыгуулары учурунда Пакистандын өзгөчө экономикалык аймагында Индиянын Аскер-деңиз күчтөрүнүн кемеси пакистандык аскердик кемеге кооптуу түрдө жакындап, агрессивдүү маневрлерди жасаган.
Пакистан Индиянын Аскер-деңиз күчтөрүнүн кемеси кооптуу маневр жасап жатып, өлкөнүн өзгөчө экономикалык аймагында (ӨЭА) пакистандык аскердик кеме менен кагылышканына байланыштуу Нью-Делиге каршылык нотасын жөнөттү.
Пакистандын Тышкы иштер министрлиги кечээ Оман деңизинде эки өлкөнүн кемелеринин ортосунда болгон кагылышууга байланыштуу билдирүү жасады.
Билдирүүдө айтылгандай, Индиянын Аскер-деңиз күчтөрүнүн кемесинин бул аракетине байланыштуу Исламабаддагы Индиянын убактылуу ишенимдүү өкүлү Тышкы иштер министрлигине чакырылып, ага болгон окуяга байланыштуу «катуу каршылык» билдирилди.
Пакистан Аскер-деңиз күчтөрүнүн «SEASPARK-26» деп аталган эки жылда бир өткөрүлүүчү машыгуулары учурунда Пакистандын өзгөчө экономикалык аймагында Индиянын Аскер-деңиз күчтөрүнүн кемеси пакистандык аскердик кемеге кооптуу түрдө жакындап, агрессивдүү маневрлерди жасаган. Натыйжада эки кеме кагылышкан.
Индиянын убактылуу ишенимдүү өкүлүнөн бул маалыматты Нью-Делидеги бийлик өкүлдөрүнө жеткирүү талап кылынды. Пакистан бул «агрессивдүү аракетти» кескин айыптап, төмөнкү билдирүүнү жасады:
«Индия тарап эл аралык укуктун нормаларын, атап айтканда, деңиздеги окуялардын алдын алууга багытталган эки тараптуу келишимдерди так сактоого чакырылат».
Индия да аскердик кемелердин кагылышуусуна байланыштуу Пакистанга каршылык билдирди
Индиянын Тышкы иштер министрлиги ошол эле күнү жарыялаган билдирүүдө кечээ Оман деңизинде эки өлкөнүн аскердик кемелери кагылышканы айтылган.
Индиянын Тышкы иштер министрлиги кагылышууга Пакистан Аскер-деңиз күчтөрүнүн «кабыл алынгыс жана кесипкөй эмес жүрүм-туруму» себеп болгонун белгиледи.
Ошондой эле Делидеги Пакистандын убактылуу ишенимдүү өкүлү Индиянын Тышкы иштер министрлигине чакырылып, ага расмий каршылык билдирилгени маалымдалды.