Ливандын бийлиги Израилдеги парламенттик шайлоо (Кнессетке шайлоо) 27-октябрда өткөнгө чейин аймактагы кырдаалды жөнгө салуу боюнча Израиль менен жүрүп жаткан сүйлөшүүлөрдө олуттуу жылыш болорун күтпөйт.
Бул тууралуу The Wall Street Journal (WSJ) басылмасы өз булактарына таянып маалымдады.
Басылманын маалыматына ылайык, Ливан тарап Израилдин өлкөнүн түштүк аймактарынан аскерлерин чыгарып кетүү маселеси боюнча да жакын арада олуттуу жылыш болоруна ишенбейт. WSJ белгилегендей, Израил аскерлеринин Ливандын аймагынан чыгарылышы Израилдеги ашкере оңчул саясий күчтөрдүн тарапкерлери арасында колдоого ээ болбойт. Дал ушул шайлоочулардын добушуна өкмөт түзүүдө Израилдин премьер-министри Биньямин Нетаньяху да таянууда.
Буга чейин Al Hadath телеканалы өз булактарына таянып, АКШнын ортомчулугу менен Римде өткөн сүйлөшүүлөрдүн жетинчи айлампасында Ливан менен Израилдин делегациялары эки өлкөнүн ортосундагы алкактык макулдашуунун аткарылышын көзөмөлдөй турган байкоочу мамлекеттердин кыска тизмеси боюнча макулдашууга жетишкенин билдирген.
Ошондой эле телеканалдын маалыматына ылайык, Израил аскерлери чыгарыла турган жаңы «пилоттук аймактарды» аныктоо боюнча географиялык талдоо аяктаган. Бирок бул аймактар боюнча акыркы чечим тиешелүү саясий чечим кабыл алынганга чейин кийинкиге жылдырылган.
26-июнда Ливан менен Израиль АКШнын ортомчулугу алдында Вашингтондо өткөн беш айлампа сүйлөшүүлөрдөн кийин алкактык макулдашууга кол коюшкан. Ага ылайык, Ливандын куралдуу күчтөрү өлкөнүн бүт аймагында мамлекеттик көзөмөлдү акырындык менен толук калыбына келтирүүгө тийиш.
Макулдашууда Израил аскерлери чыгарылуучу «пилоттук аймактарды» түзүү да каралган. Июлдун аягында Ливандын армиясы өлкөнүн түштүгүндөгү биринчи пилоттук аймакка жайгаша баштаган.
Ливан менен Израилдин делегацияларынын сүйлөшүүлөрүнүн жетинчи айлампасы 4–6-август күндөрү Рим шаарында өткөн.